Опубликовано:baq.kz
«Қытай-АСЕАН» халықаралық көрмесіне қатысқан Kazakh Invest компаниясы «көрме павильонының үздік ұйымдастырушысы» және «инвестициялық ынтымақтастыққа салынған ең зор үлес» марапаттарын алды, деп хабарлайды Baq.kz ақпарат агенттігі.
АСЕАН көрмесінде Kazakh Invest-тен бөлек «Рахат» АҚ, «Цесна Астық» концерні, «Евразия Инвест LTD» ЖШС, «Қаржау» шаруа қожалығы, «Абзал и Компания» серіктестігі, «ТК Фарм-Ақтөбе» ЖШС, «Қазақ Туризм» ұлттық компаниясы, «Бал Текстиль» компаниясы, ASIA WATERS, «Eurasian Foods Corporation» холдингі, «ЭФКО АЛМАТЫ» ЖШС, «Карат» ЖШС, «ҚТЖ» ҰК» АҚ, «Компания Нефтехим LTD» ЖШС, «Аллюр Групп», «Кэмонт» АҚ, «Қазфосфат» АҚ, «TENIR-LOGISTIC» ЖШС қатарлы қазақстандық компаниялар өз өнімдерін көрсетті.
Kazakh Invest басқарушы директоры Әділхан Өмірбаевқа марапатты ҚХР Гуанси-Чжуан автономдық ауданының губернаторы Чэнь У (Chen Wu) табыстады.
Көрме ұйымдастырушылары Қазақстанның Ұлттық стендін ең көрнекті стендтердің бірі ретінде атап өтті және Kazakh Invest компаниясына қазақстандық компанияларға қолдау көрсеткеніне, Қазақстанның әртүрлі өнімін көрсеткен 20 стендті ұйымдастырғанына алғыстарын айтты.
Қазақстаннан келген әртүрлі компаниялардың қатысуының арқасында Қытай мен басқа елдердің кәсіпкерлерінде байланыстарды жолға қою және жабдықтарды жасау, табиғи ресурстарды игеру, энергетика және қоршаған ортаны қорғау, заманауи технологиялар, өнеркәсіптік парктерге инвестициялар жылжыту және қаржы сервистері саласында ынтымақтастық жасау бойынша келіссөздер жүргізу мүмкіндігі артты.
«АСЕАН қытайлық серіктестермен байланыстарды жолға салу және инвестициялық жобаларды іске асыру үшін маңызды платформа болып табылады. Біз бірден екі марапат алғанымызға қуаныштымыз және Қазақстанның осы көрмеге қатысуы елдеріміздің арасындағы ынтымақтастықты нығайтатынына сенімдіміз», - деп атап өтті «Kazakh Invest» ҰК» АҚ директоры Әділхан Өмірбаев.
Instagram
Facebook